Manna tena kucinikki
Atingku ri katte mami
Allo bangngi bari’basa’ karueng
Ikatte ri pa’maikku
Manna ta kisarea te’ne
Assala’ nia’ jaki ri nawa-nawangku
Teaja ri pakkalu mangnyangngang
Erokja aksibuntulu’
Bolikmi pakrisik kukalimbu
Loko’ akmole-mole
Manna rongrong linoa
Bura’nea ajjari baine
Bainea ajjari bura’ne
Tappakku ta erok angmingra
Balanggu bukkulengku
Bassi urakku
Angcuruk ngaseng
Tangsingrapang kalompoangta
Manna kulompoi kalengku
Caddi tongja ri dallekangta
Kikalarroima allo bangngi
Assalak teaki pilaria’
Manna rungtung tangjakku
Tappuk pa’cinikkku
Biung ka’murungku
Ikatteji ri barambangku
Passamgmi aklampa nyawaku
Assala’ teai ikatte aklampa
Iyaji kutayang ri se’rea wattu
Nanaungmo pangngamaseangta
Mae rinakke
Naku a’langnyakmo ri lino
Angtamak ri pangngaingta
Punna aklampaki kio tonga
Ka tena naku aklampa
Punna teai ikatte angkioka
Manna ammakku angkioka
Manna manggeku angkioka
Manna bainengku angkioka
Manna anakku angkioka
Tena naku aklampa
Ka ikatteji kutayang
Iamingjo ajjari saba’
Naku ero’ aksibuntulu’
Ero’ka anggappai pangngainta
Nampa kieranga aklampa
Sikarepama akcarammeng
Angngissengi kalengku
Saba’na iyapa naku lampa
Ka kalengku angngallei kalengku
Kubilangmi kalengku kingai
Punna sikungtu pa’cinikku
Niaki kucini’
Addallek kalauka kucinikki
Addalek angraika kucinikki
Addallek timboroka kucinikki
Addallek waraka kucinikki
Sikuntu kudallekanga
Ikatteji kucinik
Iyapa na assa pangngaingta ta’kimbolongma ri kalengta
Assulu’ maki naki pangtamaka
Mangngangma pangtarang
Erokma lalangngang
Longgangmi alanga
Tena ngasengmi bonena
Battu maki angkalimbuka
Ka ikatteji kutayang
Teaja pangtarangngang
Punna sassangmo singaraka
Tepo’mi pallanggayya
Runtungmi buluka
Tenamo na’sa’ra bulu-bulua
Attayangma ri masinoa
Battumi kalengku
Angngerangi kalengku
Mange ri kalompoangna kalengku
Nanakanamo kalengku
Mange ri kalompoangna kalengku
“Asyahadu anla Ilaha ilallah”
Appualimi kalompoangna kalengku
“Wa Asyahadu anna Muhammadur Rasulullah”
Syahada’ kalengku
Syahada’ kalompoangna kalengku
Nipassyahada’mi kalengku
Risyahada’ kalompoangna kalengku
Kucinikmi syahada’
Assyahada’ mange ri syahada’
Salama’mi kalengku
Saba’ niaki kalengku
Appalak salama’
Mange ri kalompoangna kalengku
Angcurukmi kalengku
Angtamak ri kalengku
Ilalang ri kalompoangna kalengku
Gowa, 5 Maret 2020
SYAHRIR AR
